BEDE CHRONOLOGIA CONTINUATA AUCTORE ANONYMO. ANNO 731, Ceolwulfus rex captus et adtonsus et remissus in regnum; Acca episcopus de sua sede fugatus. Anno 732, Egbertus pro Wilfrido episcopus factus. Cynebertus episcopus Lindisfarnorum obiit. Anno 733, eclipsis facta est solis XIX kalendas Septembris circa horam diei tertiam; ita ut pene totus orbis solis, quasi nigerrimo et horrendo scuto, videretur esse coopertus. Anno eodem Tatwine archiepiscopus, accepto ab apostolica auctoritate pallio, ordinavit Alwicum et Sigfridum episcopos. Anno 734, luna sanguineo rubore perfusa, quasi hora integra, II kalendarum Februariarum circa galli cantum, dehinc nigredine subsequente ad lucem propriam re versa. Anno eodem, 734, Tatwine episcopus obiit. Anno 735, Nothelmus archiepiscopus ordinatur; et Egbertus episcopus, accepto ab apostolica sede pallio, primus post Paulinum in archiepiscopatum confirmatus est; ordinavitque Fruidbertum et Fruidwaldum episcopos, et Beda presbyter obiit. Anno 737, nimia siccitas terram fecit infecundam ; et Ceolwulfus sua voluntate adtonsus regnum Eadberto reliquit. Anno 739, Ethelhartus Occidentalium Saxonum rex obiit; et Nothelmus archiepiscopus. Anno 740, Cuthbertus pro Nothelmo consecratus est. Ethelbaldus rex Merciorum per impiam fraudem vastabat partem Northanhumbrorum; eratque rex eorum Eadbertus occupatus cum suo exercitu contra Pictos. Ethelwaldus quoque episcopus obiit, et pro eo Conwulfus ordinatur antistes. Arwine et Eadbertus interemti. Anno 741, siccitas magna terram occupavit. Carolus rex Francorum obiit; et pro eo filii Carolomanus et Pippinus regnum acceperunt. Anno 745, Wilfridus episcopus, et Ingwaldus Londoniæ episcopus, migraverunt ad Dominum. Anno 747, Herefridus vir Dei obiit. Anno 750, Cuthredus rex Occidentalium Saxonum surrexit contra Ethelbaldum regem et Engusum. Theneorus atque Eanredus obierunt. Eadbertus campum Cyil cum aliis regionibus suo regno addidit. Anno 756, anno regni Eadberti quinto, idibus Januarii recte quan 753 eclipsis solis facta est. Postea eodem anno et mense, hoc est, nono kalendarum Februariarum, luna eclipsim pertulit, horrendo, et nigerrimo scuto. Bonifacius, qui et Winfridus, Francorum episcopus, cum quinquaginta tribus martyrio coronatus est; et pro eo Redgerus consecratur archiepiscopus a Stephano рара. Anno 757, Ethelbaldus rex Merciorum a suis tutoribus noctu morte fraudulenta miserabiliter peremtus occubuit; Beonredus regnare cœpit; Cynewulfus rex Occidentalium Saxonum obiit. Eodem etiam anno Offa, fugato Beonredo, Merciorum regnum sanguinolento quæsivit gladio. Anno 758, Eadbertus rex Northanhumbrorum, Dei amoris causa et cœlestis patriæ, violentia accepta sancti Petri tonsura, filio suo Oswulfo regnum reliquit. Anno 759, Oswulfus a suis ministris facinorose occisus est; et Ethelwaldus anno eodem a sua plebe electus intravit in regnum; cujus secundo anno magna tribulatio mortalitatis venit, et duobus ferme annis permansit, populantibus duris ac diversis ægritudinibus, maxime tamen dysenteriæ languore. Anno 761, Oengus Pictorum rex obiit, qui regni sui principium usque ad finem facinore cruento tyrannus perduxit carnifex; et Oswinus occisus est. Anno 765, Aluchredus rex susceptus est in regnum. Anno 766, Egbertus archiepiscopus prosapia regali ditatus ac divina scientia imbutus, et Frithubertus, vere fideles episcopi, ad Dominum migraverunt. |