[Now for the first time printed from Gray's autograph in the Stonehewer collection.-ED.]
Jussit, & humana qua parte locatus es in re Disce.
PENDET Homo incertus gemini ad confinia mundi Cui parti accedat dubius; consurgere stellis An socius velit, an terris ingloria moles
Reptare, ac muto se cum grege credere campis : Inseruisse choro divum hic se jactat, & audet Telluremque vocare suam, fluctusque polumque, Et quodcunque videt, proprios assumit in usus. "Me propter jam vere expergefacta virescit Natura in flores, herbisque illudit, amatque Pingere telluris gremium, mihi vinea fœtu Purpureo turget, dulcique rubescit honore; Me rosa, me propter liquidos exhalat odores; Luna mihi pallet, mihi Olympum Phoebus inaurat, Sidera mi lucent, volvunturque æquora ponti."
Se secum insistit, tantumque hæc astra decores Estimat esse suæ sedis, convexaque cœli Ingentes scenas, vastique aulæa theatri.
At tibi per deserta fremit, tibi tigris acerbum Succenset, nemorum fulmen, Gangeticus horror? Te propter mare se tollit, surgitque tumultu?
Hic ubi rimavi, atque impallescere libris Perstetit, anne valet qua vi connexa per ævum Conspirent elementa sibi, serventque tenorem ; Sufficiant scatebræ unde mari, fontesque perennes Jugis aquæ fluviis, unde æther sidera pascat, Pandere? nequaquam: secreta per avia mundi Debile carpit iter, vix, et sub luce maligna Pergit, et incertam tendit trepidare per umbram. Fata obstant; metam Parcæ posuere sciendi, Et dixere, veni huc, Doctrina, hic terminus esto. Non super æthereas errare licentius auras
Humanum est, at scire hominem; breve limite votum Exiguo claudat, nec se quæsiverit extra. Errat, qui cupit oppositos transcendere fines, Extenditque manus ripe ulterioris amore; Illic gurges hiat late, illic sæva vorago Et caligantes longis ambagibus umbræ.
Oceani fontes, et regna sonantia fluctu, Machina stellantis cœli, terræque cavernæ Nullis laxantur mortalibus, isque aperiret Hæc qui arcana poli, magnumque recluderet æquor, Frangeret æternos nexus, mundique catenam. Plurimus (hic error, demensque libido lacessit) In superos cœlumque ruit, sedesque relinquit, Quas natura dedit proprias, jussitque tueri. Humani sortem generis pars altera luget, Invidet armento, et campi sibi vindicat herbam.
O quis me in pecorïs felicia transferet arva, In loca pastorum deserta, atque otia dia? Cur mihi non Lyncisve oculi, vel odora canum vis Additur, aut gressus cursu glomerare potestas? Aspice ubi, teneres dum texit aranea casses, Funditur in telam, et late per stamina vivit? Quid mihi non tactus eadem exquisita facultas, Taurorumve tori solidi, pennæve volucrum Pertæsos sortis doceant responsa silere
Si tanto valeas contendere acumine visûs, Et graciles penetrare atomos; non æthera possis Suspicere, aut lati spatium comprendere ponti. Vis si adsit major naris; quam, vane, doleres Extinctus fragranti aura, dulcique veneno ! Si tactus, tremat hoc corpus, solidoque dolore Ardeat in membris, nervoque laboret in omni; Sive auris, fragor exanimet, cum rumpitur igne Fulmineo cœlum, totusque admurmurat æther: Quam demum humanas, priscasque requirere dotes? Attonitus nimium cuperes, nimiumque reverti In solitam speciem, veterique senescere forma.
Nubila seu tentes, vetitumque per aëra surgas, Sive rudes poscas sylvas, et lustra ferarum; Falleris; in medio solium Sapientia fixit. Desine sectari majora, minorave sorte,
Quam Deus, et rerum attribuit natura creatrix.
« ForrigeFortsett » |